“Sog‘liqni saqlash – TIHE 2025” 29-Toshkent xalqaro ko‘rgazmasi doirasida Koreya va O‘zbekiston o‘rtasida farmatsevtika yo‘nalishida hamkorlik bo‘yicha seminar bo‘lib o‘tdi.
“Sog‘liqni saqlash – TIHE 2025” ko‘rgazmasi doirasida, "Tashkent Pharma Park" farmatsevtika klasterida, Farmatsevtika tarmog‘ini rivojlantirish agentligi ko‘magida, Koreya savdo va investitsiyalarni rag‘batlantirish agentligi "KOTRA" - "O‘zbekistonda farmatsevtika sohasidagi hozirgi vaziyat va Koreya bilan hamkorlik istiqbollari" mavzusida muvaffaqiyatli seminar o‘tkazdi.
Tadbir 30 dan ortiq ishtirokchilarni, shu jumladan davlat idoralari, xususiy kompaniyalar vakillarini, shuningdek, "Dong-A Pharm", "DrTech", "Theragen Etex", "Jeesung Engineering", "Young-in Biotech", "DooVAC", "Slock Implant", "Youngmedi", "BION", "ZenithT", "Orjena (Wannabe Cosmetic)" kabi 15 ta etakchi farmatsevtika, kosmetika va tibbiyot kompaniyalarini o‘z ichiga olgan Koreya delegatsiyasi vakillarini bir joyga birlashtirdi.
Farmatsevtika tarmog‘ini rivojlantirish agentligi direktori Abdulla Azizov so‘zga chiqib, O‘zbekistonda farmatsevtika sanoatining hozirgi holati, olib borilayotgan islohotlar, amalga oshirilayotgan loyihalar va kelajakdagi rejalari haqida taqdimot o‘tkazdi. U o‘z nutqida sohani yanada rivojlantirish uchun xalqaro hamkorlik va tajriba almashish muhimligini ta'kidladi.
Shuningdek, ishlab chiqarishni mahalliylashtirish, qo‘shma korxonalar tashkil etish imkoniyatlari va sog‘liqni saqlash sohasiga investitsiyalarni jalb etish yo‘llari muhokama qilindi.
Ushbu tadbir Koreya Respublikasi Prezidentining O‘zbekistonga tashrifi chog‘ida 2024 yil iyun oyida imzolanayotgan o‘zaro anglashuv memorandumi qoidalarini amalga oshirish borasidagi sa'y-harakatlarning davomi bo‘ldi.
"KOTRA" vakillari barcha sheriklar va ishtirokchilarga faol ishtiroki uchun o‘z minnatdorchiligini va kelgusida yana samarali hamkorlik qilishga ishonch bildirdi.
